Fróðleikur

Vistvæna eldsneytið metan fær Svansvottun

22.11.2016

Íslenska eldsneytið metan hlaut í dag norræna umhverfismerkið Svaninn og er þar með fyrsta íslenska eldsneytið til að hljóta slíka vottun. Umhverfismerkið tekur til alls lífsferils metans sem framleitt er af SORPU og er m.a. staðfesting á að framleiðsla og notkun eldsneytisins stuðlar að lágmarks losun gróðurhúsalofttegunda. Þá er orkunotkun í framleiðsluferlinu haldið í lágmarki og komið í veg fyrir sóun eins og kostur er. Vottunin er háð því að eldsneytið mæti sjálfbærniviðmiðunum Evrópureglugerðar um endurnýjanlega orkugjafa og kröfum um gæði eldsneytisins.

Framleiðsla metans eykst á komandi árum
Metangasframleiðsla í Álfsnesi árið 2015 samsvaraði ríflega 2 milljónum bensínlítra og notkun þess í stað jarðefnaeldsneytis sparaði um 33.000 tonn af CO2. Um 1400 ökutæki nýta í dag metan sem eldsneyti en samanlagt er sótspor þeirra aðeins á við 14 bensínbíla og sótmengun nánast engin.

Árið 2018 hefst starfsemi fyrstu gas- og jarðgerðarstöðvarinnar á Íslandi, hjá SORPU í Álfsnesi. Metanvinnsla SORPU mun þá aukast til muna og heildarframleiðslan frá stöðinni og urðunarstaðnum duga til að knýja um 7-8.000 metanbíla. Auk þess mun stöðin skila um 10-12.000 tonnum af jarðvegsbæti sem nýta má til uppgræðslu lands.

Metanbifreiðar eru umhverfisvænn kostur og eru ódýrari í innkaupum og í rekstri en sambærilegir bílar sem ganga fyrir jarðefnaeldsneyti. Auknu framboði metans fylgja tækifæri og geta sveitarfélög og fyrirtæki aukið sjálfbærni í rekstri og dregið úr sótspori sínu með því að nýta metan á ökutæki. Svanurinn er þekkt gæðamerki og vottun metansins því kærkomin staðfesting á kostum þessa íslenska vistvæna eldsneytis.

Bæklingur um metan.

Nánari upplýsingar veitir Björn H. Halldórsson framkvæmdastjóri SORPU í síma 660 2233.

          

Kristín Linda Árnadóttir forstjóri Umhverfisstofnunar afhenti Birni H. Halldórssyni framkvæmdastjóra SORPU svansvottunina á haustráðstefnu Svansins.

Til baka

Vistvæna eldsneytið metan fær Svansvottun

22.11.2016

Íslenska eldsneytið metan hlaut í dag norræna umhverfismerkið Svani...

Skoða tilkynningu