Spurt og Svarað
Hvenær fjölgar afgreiðslustöðum.
Afgreiðslustöðum mun fjölga í takt við aukna eftirspurn. Afgreiðsla N1 á Bíldshöfða getur annað margfaldri eftirspurn dagsins í dag og þar er hægt að fjölga sjálfsölum fyrir metan eldsneyti á stuttum tíma. Uppfærsla á bensínbílum leiðir orkukerfisskiptin í samgöngum landsins í dag og þess ekki lengi að bíða að sjálfsölum fyrir metan muni fjölga. Íslenska metanið sem framleitt er á Álfsnesi er nærtækast að nota á höfuðborgarsvæðinu og nærliggjandi nágrannasveitarfélögum og því viðbúið að næsti nýi afgreiðslustaðurinn fyrir metan eldsneyti verði á því svæði .
Þar fyrir utan mætti skapa mikinn og margþættan ávinning með afgreiðslu á metan eldsneyti á landsbyggðinni, t.d. á Akureyri. Með samtakamætti Akureyrarbæjar og fyrirtækja á Eyjafjarðarsvæðinu getur metan eldsneyti verið í boði á Akureyri á næstu misserum ef því er að skipta. Framkvæmanlegt er að flytja metan frá Álfsnesi til Akureyrar í færanlegri afgreiðslustöð. Verð á metani á Akureyri yrði eitthvað hærra en í Reykjavík með því móti en gæti þó verið umtalsvert lægra en verð á bensíni.
Metanvæðingin í landinu getur orðið hröð ef okkur ber gæfa til að skapa samtakmátt meðal sveitarfélaga, fyrirtækja, almennings og hins opinbera um stefnumiðuð orkukerfisskipta í samgöngum þar sem við nýtum þau tækifæri sem við eigum til að stórauka notkun og framleiðslu á nútíma-metani. Sem dæmi, sýndi Svanhildur Ósk Ketilsdóttir fram á það í meistaravör sinni 2009 að á Akureyrarsvæðinu er unnt að framleiða nútíma-metan úr mykju sem nemur að orkuinnihaldi um 2 ,3 milljónum bensínlítra á ári. Hér er um að ræða magn sem dugað getur fyrir meðalársnotkun 2000 til 4500 fólksbíla í Eyjafirði enda hafa bílvélar þróast mikið á þessari öld og algengt að eldsneytisnotkun smærri fólksbíla á metani sé á bilinu 4-5 Nm3 /100km. Athugið að rannsókn Svanhildar miðaðist við nýtingu á mykju einni og sér. Og þá allt annað lífrænt efni sem til fellur á svæðinu eftir. Rannsóknir á hagfeldni metanframleiðslu eru í gangi víðar í landinu.
Framleiðslugeta SORPU bs úr hauggasi frá urðunarstaðnum á Álfsnesi er aðeins nýtt að hluta í dag , 20-25%. Aukning á notkun metans á höfuðborgarsvæðinu er hröð um þessar mundir og stefnir í að sala tvöfaldist milli áranna 2010 og 2011. Full ástæða til að hraða áformum sveitarfélaga um að hefja frekari metanframleiðslu á höfuðborgarsvæðinu enda stefnir í að núverandi framleiðslugeta verði fullnýtt á árinu 2013. Áform eru uppi um að reisa metanverksmiðju á höfuðborgarsvæðinu og stórauka framleiðsluna. Þar fyrir utan er mikið magn af metani til á heimsmarkaði og verð mun lægra en á bensíni og dísilolíu. Tímabundinn innflutningur er því ávallt mögulegur ef því er að skipta. Algeng viðspyrna breytinga eins og hér um ræðir er að benda á kostnaðinn við viðhafa þær. Í þessum stutta pistli er látið nægja að minna á kostnað almennings, umhverfiskostnaðinn og gjaldeyriskostnaðinn samfara því að nýta ekki tækifæri okkar til stóraukinnar metanvæðingar í samgöngum landsins. Við eigum allt að vinna með að stórauka metanframleiðsluna í landinu, áhættan getur vart verið minni enda fyrirsjáanlegt að öll hagfelld framleiðsla á metani muni veria nýtt í samgöngum landsmanna í framtíðinni.
Sjá Metanblaðið 240610: Viðtal við Björns H. Halldórsson, framkvæmdastjóri SORPU bs.
