Spurt og Svarað
Er nóg til af metan eldsneyti ?
Já, í dag er nóg til en við þurfum að stórauka framboðið til að geta annað fyrirsjáanlegri eftirspurn á komandi árum. Frá árinu 2000 hefur framleiðslugeta á íslensku metaneldsneyti á Álfsnesi verið stórlega vannýtt. Á árinu 2010 og 2011 jókst notkunin hins vegar verulega og útlit fyrir að núverandi framleiðslugeta á Álfsnesi verði nýtt að verulegu leiti í árslok 2012. Þá munu þúsundir einstaklinga ferðast daglega á íslensku metani og skapað sér, umhverfinu og íslensku samfélagi mikinn ávinning með notkun á því í stað bensíns og dísilolíu. Þar fyrir utan er unnt að stórauka framleiðslu á íslensku metani á höfuðborgarsvæðinu og á landsbyggðinni og skapa enn meiri umhverfislegan og samfélagslegan ávinning. Mikil þróun er að eiga sér stað í heiminum til orkukerfisskipta í samgöngum og ljóst að notkun á tvinnbílum muni einnig aukast mikið í heiminum. Slíkir bíla nýta rafmagn í bland við eldaneyti til að knýja för. Horft er til þess að með notkun á metan tvinnbílum megi víða um heim ná fram umtalsverðum ávinningi til umhverfismildunar í landsamgöngum. Nú þegar eru strætisvagnar komnir á markað sem búnir eru metan-tvinn-orkukerfi og fólksbílar einnig verið hannaðir. Þar fyrir utan er fyrirsjáanleg mikil þróun á brunavélum þannig að mun minna magn af metaneldsneyti þarf til að skapa sama afl og ferðafrelsi en áður.
Engin ástæða er til þess að ræða um metanvæðingu í samgöngum landsmanna sem einu framtíðarlausnina til orkukerfisskipta í samgöngum þjóðarinnar á þessari öld enda binda margir vonir við að rafbílar muni einnig þróast á öldinni þannig að hagfeldni þeirra aukist til muna við íslenskar aðstæður. Þar að auki mun notkun á lífdísil aukast í landinu í samræmi við hagfeldni þess að gera svo. Íblöndun á metanóli og etanóli út í bensín mun einnig geta mildað umhverfisáhrif frá samgöngum og í einhverri framtíð kann DME einnig að geta skapað ávinning fyrir þjóðina. Þar fyrir utan og ekki síst hefur mikil þróun átt sér stað í vetnistækninni á liðnum árum og vonir bundnar við að sú tækni skili hagfelldum valkosti til samgangna á næstu árum.
Það sem blasir hins vegar við okkur Íslendingum og enginn ágreiningur er um, er að stóraukin metanvæðing í samgöngum þjóðarinnar er þjóðþrifaverkefni sem við getum ráðist í í dag enda fyrirsjáanlegt að metaneldsneyti geti nýst þjóðinni með hagfelldum hætti til framtíðar litið í samgöngum á landi og á sjó. Áhættan af stóraukinni metanvæðingu getur vart verið minni - við höfum allt að vinna.
Sjá: Hráefni til metnframleiðslu
Sjá: Metanblaðið 240610: Viðtal við Björn H. Halldórsson, frmakvæmdastjóra SORPU bs.
