Urðunarstaður
Á urðunarstöðum vítt og breytt um landið og um allan heim hefur tíðkast að grafa margvíslegan lífrænan úrgang í jörðu. Súrefni (O) á ekki greiðan aðgang að lífrænum úrgangi sem grafinn er í jörðu og því rotnar lífrænn úrgangur á urðunarstöðum með loftfirtu niðurbroti (gerjun) sem sérstakar rotverur í umhverfinu framkvæma ( bakteríur og sveppir). Við niðurbrot á lífrænu efni með þessum hætti myndast svokallað hauggas sem meðal annars inniheldur lofttegundin metan (CH4). Metan er áhrifamikil gróðurhúslofttegund sem æskilegt er að sleppi sem minnst út í andrúmsloftið. Sökum þessa kveða reglur á um að hætta verði að urða lífrænan úrgang í heiminum og hann meðhöndlaður með öðrum hætti. Metanframleiðsla úr lífrænum úrgangi skapar sérlega hagfellt ferli til að mæta þeim mikla kostnaði samfélagsins sem meðhöndlun á úrgangi mun hafa í för með sér í framtíðinni hvort sem er.
Frá urðunarstöðum sem þegar eru til staðar mun losun á metani víða eiga sér stað í allt að 20 ár og því umhverfislega æskilegt að safna hauggasi á þeim stöðum. Á Álfsnesi inniheldur hauggasið um 57% metan. Auk þess sem víða má safna hauggasi frá urðunarstöðum löngu eftir að hætt verður að urða lífrænan úrgang má einnig gera ráð fyrir að unnt sé að nýta áður urðaðan úrgang til metanframleiðslu í verksmiðju og fanga þannig mun meira af því metani sem unnt er að losa úr lífmassanum.
Víða um heim er hauggas frá urðunarstöðum notað óhreinsað til húshitunar eða rafmagnsframleiðslu. Þar sem við Íslendingar búum það vel að geta hitað hús okkar upp með heitu jarðvatni og aflað raforku með virkjun fallvatna og jarðvarma var ljóst að hagfelldasti kosturinn á Íslandi var að hreinsa hauggasið og framleiða úr því ökutækjaeldsneyti.
Í dag framleiðir SORPA bs. metan ökutækjaeldsneyti í hæsta gæðaflokki með allt að 98% hreinleika og býr yfir þekkingu til að stórauka framleiðslu á metani í landinu. Við Íslendingar erum því vel í sveit settir með að stórauka notkun okkar á metan eldsneyti í stað jarðefnaeldsneyti ( bensíni og dísilolíu).
Öll teikn eru á lofti um mikla viðhorfsbreytingu í samfélaginu gagnvart stóraukinni metanvæðingu á næstu misserum og árum enda er það að renna upp fyrir þjóðinni sú dýrmæta eign okkar að búa yfir þekkingu og getu til að framleiða það magn af metani sem við viljum. Sú staðreynd að við nýtum í dag aðeins hluta af framleiðslugetu okkar á Álfsnesi skapar okkur tækifæri til að viðhafa fljúgandi start til stóraukinnar metanvæðinguar í samgöngum landsmanna með miklum efnahagslegum og umhverfislegum ávinningi.
